Ny veg til fagbrev

Cathrine Halleraker er den første kandidaten ved Bømlo Opplæringskontor som går opp til fagbrev gjennom ordninga Fagbrev på jobb. Ho arbeider hos Siemens Energy, og får opplæring innan automatiseringsfaget medan ho er i full jobb.

Fagbrev på jobb er ei opplæringsordning for ufaglærte arbeidstakarar med allsidig erfaring i eit lærefag og som ønskjer å ta fagbrev i dette faget. I staden for å gå den tradisjonelle vegen med skulegang, får kandidaten opplæring gjennom praktiske arbeidsoppgåver i eigen bedrift. 

Cathrine signerte kontrakt på denne ordninga no i vår, og har saman med Ann-Helen Nesse Sætre og Anette Sakseide utarbeida ein intern opplæringsplan for opplæringstida si. Den skal sikre at ho får jobbe med oppgåver som dekkjer kompetansemåla i faget, og at ho er godt førebudd når tida kjem for å ta fagprøva.

Hos Siemens Energy på Ternetangen blir det produsert sensorar som måler trykk og temperatur i undervassinstallasjonar for olje- og gassindustrien. Automatiseringsfaget passar godt til dette, sidan det handlar om system som styrer og overvakar tekniske prosessar. Cathrine får dermed opplæring i eit fag som er relevant både for jobben hennar og for industrien generelt.

Dette er første gong Bømlo Opplæringskontor har ein kandidat innan Fagbrev på jobb-modellen. Erfaringane frå dette løpet vil kunne gje nyttig innsikt for både opplæringskontoret og andre bedrifter i regionen som ønskjer å satse på vidareutdanning av eigne tilsette.

For dei som ønskjer å ta fagbrev på liknande vis, kan de lese meir informasjon om ordninga her. Ta gjerne kontakt med Bømlo Opplæringskontor ved interesse.