Dersom du ikkje har det bra på jobb, er det viktig at du seier frå tidleg. Ofte kan mykje løysast gjennom ein god prat og tett oppfølging. Det første steget er derfor å ta kontakt med lærebedrifta di.

Du kan mellom anna snakke med:

• instruktøren din

• fagleg leiar

• verneombodet, som skal passe på at arbeidsmiljøet er trygt og godt, og hjelpe dersom du opplever utrygge eller belastande forhold på jobb

• tillitsvald, som representerer dei tilsette og kan gi råd, støtte og hjelp dersom du opplever utfordringar eller er usikker på rettane dine som lærling

Alle lærebedrifter skal jobbe for eit trygt og godt arbeidsmiljø, og dei fleste bedrifter har også eigne rutinar eller varslingssystem dersom noko er vanskeleg eller ikkje fungerer som det skal.

Det er lov å be om hjelp – både dersom du opplever utfordringar fagleg, sosialt eller knytt til arbeidsmiljøet.

Dersom du ikkje opplever at situasjonen blir betre etter å ha tatt det opp med lærebedrifta, eller du synest det er vanskeleg å gå til nokon internt i bedrifta, kan du kontakte opplæringskontoret.

Opplæringskontoret er der for å støtte deg gjennom læretida og kan hjelpe med råd, rettleiing og samtalar dersom du har utfordringar på arbeidsplassen, med opplæringa eller trivselen din.

Som lærling er du omfatta av elev- og lærlingombudet i fylket. Du kan lese meir om korleis dei kan hjelpe deg her.