Felles opplæringsbank for lærlingar i barne- og ungdomsarbeidarfaget

Denne våren har instruktørar i barne- og ungdomsarbeidarfaget i Bømlo kommune gått saman om å lage ein felles oppgåvebank for alle lærlingane i kommunen. Målet har vore å sikre at alle lærlingar får ei god og heilskapleg fagopplæring – uavhengig av kva skule dei har læretida si ved.

Oppgåvene er kopla til kompetansemåla i læreplanen, og banken skal bidra til at lærlingane får innom alle relevante tema og arbeidsoppgåver i løpet av læretida. I tillegg gjer dette det enklare for nye instruktørar å ta over ansvaret for oppfølging av ein lærling dersom det skulle bli behov for det.

Det er ein engasjert gjeng med instruktørar frå ulike skular i kommunen som har stått bak arbeidet. Resultatet er ein konkret opplæringsplan, med rom for lokal tilpassing og fleksibilitet i kvardagen.

Plan for revidering av innhaldet er allereie lagt, slik at banken skal halda seg oppdatert og relevant også framover.